2009/10/18

بسم الله ... توكلنا على الله


بسم الله الرحمن الرحيم :
والله يا جماعة بما إنى أول مرة أنشئ مدونة (مدون مستجد يعنى!!) فاسمحولى -لو فيها رزالة -أعرفكم بالعبد لله ... ومعلش بقه سامحونى فى شوية الوقت الثمين بتاعكم اللى هيضيع فى التعرف على أخوكم الغلبان بس لعلها تكون فاتحة خير بالنسبة لى إنى اتعرف على ناس محترمين ومثقفين زيكم نستفيد من بعض فى أمور الدنيا والدين.

أنا أخوكم فى الله (محمد محفوظ) صيدلى مصرى بشتغل فى السعودية منذ أقل من سنة _ من مواليد المنصورة محافظة الدقهلية_ وبحب جدا أقرأ فى الكتب الدينية والعلمية _مش شرط فى مجال الصيدلة بس _بل فى أى مجال وأتابع أخبار الدنيا وبحب الرياضة أوى خاصة الجرى وكرة القدم وأحيانا "بستعيل!!" وأقرأ قصص فكاهية (بتوصل أحيانا لدرجة ميكى جيب!!) أو قصص خيال علمى .

كنت بتابع من فترة مش كبيرة أوى بعض المدونات ... الفكرة عجبتنى بس كنت مكسل شوية بس ولله الحمد توكلت على الله ..واحنا ونصيبنا.

اخترت العنوان ده (حصل خير!!!) للمدونة بتاعتى لإنى بحب الأمل والتوكل على الله فى كل شيئ _وليس التواكل _ ففى كل الأحوال وأيا كانت النتائج اصبر بل وحاول الارتقاء إلى مرتبة أعلى من الصبر ألا وهى الرضا ... فالعبد فى هذه الدنيا يسعى بكل جد واجتهاد فى مرضاة ربه سواء فى الدين أو الدنيا والمطلوب السعى إلى النجاح وليس إدراكه ... فإن وفقك الله إلى النجاح والوصول إلى هدفك فبها ونعمت والحمد لله وإن كانت الأخرى فاعلم أن الله لن يضيع سعيك هذا سدى واستعن بالله وحاول مرة أخرى وثالثة ورابعة مادام قلبك ينبض .. أكرر (أنا ضد التواكل)...فالسماء لا تمطر ذهبا...

وزى مانتو شايفين كده أخوكم رغااااااى شويتين وأحيانا بكتب بالعامية وأحيانا بتاخدنى الحماسة وأكتب بالفصحى ... المهم إنى أفضفض وأوصل المعلومة وخلاص ... وربنا يكرمنا ويتقبل منا جميعا..

وعلى كل حال ..... حصل خير!!!

والسلام عليكم