لأ...مش وردى

(ياابنى انتا هتفرسنى..؟؟!! إنتا مش عايش معانا على الأرض ولا معندكش مشاكل زينا..؟؟ إش حال إنتا متغرب زينا وكاتب كتابك ووراك التزامات..؟؟نضارتك وردى أوى كده ليه..؟؟)هكذا قال لى وهو فى منتهى الضيق والخنقة...

قلت محاولا امتصاص غضبه (طيب صلى على النبى وهدى نفسك وأنا هشرحلك أنا بفكر إزاى وهثبتلك حالا إنى واقعى جدا وعملى والنضارة بتاعتى مش وردى ولا حاجة)...هدأ قليلا ليسمع ما سأقوله بنفاذ صبر...فاستطردت كلامى (احنا-ولله الحمد والمنة-مؤمنين بالله وربنا سبحانه وتعالى قال"وما من دابة فى الأرض إلا على الله رزقها ويعلم مستقرها ومستودعها كل فى كتاب مبين" "إن الله هو الرزاق ذو القوة المتين" والنبى عليه الصلاة والسلام قال <لوأنكم تتوكلون على الله حق توكله لرزقكم كما يرزق الطير تغدو خماصا وتروح بطانا>يعنى بتصحى الصبح تسعى وتدور على رزقها وهى جعانة وآخر النهار ترجع شبعانة وآخر تمام...بعد كل ده عاوزنى أنرفز نفسى ليه وأضايق ليه ؟؟ طالما إنى مش مقصر فى المجهود حتى لو العملية أزمت شوية مش مهم ماهو ربنا اللى قال كده "الله يبسط الرزق لمن يشاء من عباده ويقدر له إن الله بكل شيئ عليم" يعنى يوسع فى الرزق لمن يشاء ويضيق على من يشاء لحكمة هو أعلم بها...ده من الناحية الدينية...حلو كده؟؟

ثانيا من الناحية الواقعية افترض إن شخصين خسروا خسارة مادية كبيرة...احسبها بالعقل كده مين خسران أكتر اللى هيتضايق وينرفز نفسه ويحبط ولا اللى هيقول خلاص قدر الله وماشاء فعل اللهم أجرنى فى مصيبتى واخلف على خيرا منها ...الأول طبعا خسران أكترلأنه مش بس خسر ماديا ده كمان نفسيته تعبت وثقته فى نفسه اتهزت أما التانى خد حسنات وحافظ على نفسيته وهيبقى عنده أمل يحاول ويجرب وأكيد فى محاولة منهم ربه هيكرمه وينجح عشان رضى بقضائه وتوكل عليه "ولله غيب السماوات والأرض وإليه يرجع الأمر كله فاعبده وتوكل عليه وما ربك بغافل عما تعملون"...شفت الفرق بقه مع إنهم الاتنين خسروا نفس القيمة المادية ... بس شتااااان...سبحان الله ) .

سكتنا لبرهة ثم أخذ نفسا عميقا وتبسم-أخيرا-ابتسامة خفيفة ثم قال ( عندك حق...الحمد لله على كل حال ) ...

((: شكر خاص جدا {عالم حبيب} و { E73} :))